Friday, November 26, 2010

اردو اظہاریہ نویسوں کا اجتماع یا اجتماع ضدین

جھلکیاں

محل وقوع : شمال مغربی وسطی علاقہ ناظم آباد

ریستوران: اطالوی  خمیری روٹی فروش /پیزاہٹ

پسِ پردہ موسیقی: بجائے آرکسٹر اکے ہندوستانی اور فرنگی

ماحضر/ضیافت: اطالوی، خمیری روٹی جو باورچی حضرات کے تساہل پر  دلیل ، کہ رکابی اور دسترخوان کا تصور غائب

شرکاء: راشد، عمار، عدنان (شکاری کا بلاگ مگر فی الحال تائب)، م م مغل( ناطقہ اور آئینہ کیوں نہ دوں) فہیم (اظہاریہ نویسی سے تائب)، محمد اسد، فہد کیہر (ابو شامل)، عمران (جنہیں مہمان سمجھا گیا) اور  (طقی بے طقی والے) شعیب صفدر
 ارے ہاں بھئی ۔۔ ہم بھی کتنے بھلکٹر نکلے ۔۔ نعمان کی ڈائری کو تو بھول ہی گئے ۔  کہ نعمان بھی ہمارے ہمراہ ہم نوالہ ہم پیالہ و پراٹھہ (اطالوی) رہے ۔۔   یہ تو اسد بھیا کا شکریہ کہ یاد دلا دیا ۔۔۔ شعیب بھائی سے کوئی گلہ نہیں کہ نئی نئی شادی ہوئی ہے تو دماغ کوئی زیادہ اچھا کام نہیں کرتا۔۔ مگر یہ باقی دوستوں کو کیا ہوا کہ ۔۔۔۔۔  خیر اب تو شامل ہوگیا نا ں نام ۔۔۔

شعیب صاحب شادی کے بعد بھاوج سے پہلا جھوٹ(غالبا) بول کر اس ملاقات میں شامل ہوئے جبھی سب سے تاخیر میں پہنچے، ان کے آنے قبل ہم خاصے خاموش رہے لیکن ہم سے بھی زیادہ خاموشی عمران صاحب کی طرف سے تھی ، مملکت ِ پاکستان کے حکمرانوں کی طرح اس بار ہمارا کوئی ایجنڈا نہ تھا سو عشائیہ پر منتطبق خیال کیجے ، ادھر اُدھر کی باتوں میں پتا نہ چلا کہ کتنا وقت گزر گیا،  واپسی پر خاتون نما لڑکی نے فرنگی زبان میں تشکر آمیز کلمات ادا کیے تو ہمارے منھ سے بے ساختہ"جیتی رہو بٹیا " نکلا  اور موصوفہ کو جھینپنے کا موقع دیے بغیر ہی ہم باہر نکل آئے اور دودھ پتی سے اپنے  مشرقی معدے کو تر کیا، طقی بے طقی صاحب ۔۔ معاف کیجے گا شعیب صاحب نے غزل کی فرمائش کی سو تازہ غزل سنائی۔ بعد ازں بلیلہ پر عمار میاں کے ہمراہ گھر کو چل دیے ۔ 

نتیجہ : وہی ڈھاک کے تین پات / کھایا پیا کچھ نہیں گلاس توڑا بارہ آنہ

25 comments:

  1. شکریہ امین صاحب ، بڑی محبت جناب

    ReplyDelete
  2. شکریہ کیا ایجنڈا یہ تھا
    "کراچی میں اردو بلاگنگ کی ترویج کیسے ممکن ہے؟"

    ReplyDelete
  3. جی مغل بھائی!

    کل شعیب صفدر صاحب نے اس ناچیز کو بھی یاد کیا تھا اس محفل میں شرکت کے لئے لیکن کل کچھ اس طرح کی مصروفیات رہیں کہ باوجود خواہش کے پہنچ نہیں سکا. آپ کی مختصر روداد پڑھ کر خوشی ہوئی . تصویری جھلکیاں بھی اگر ہوسکیں تو ضرور ارسال کریں.

    ReplyDelete
  4. افسوس رہا کہ شامل نہ ہو سکے۔ مصروفیات کی نوعیت ہی کچھ ایسی ہے آجکل۔ شعیب صفدر صاحب نے یادرکھا شکریہ۔

    ReplyDelete
  5. نہایت مختصر و و عمدہ! کیا بات ہے۔

    ReplyDelete
  6. نتیجہ بدل دیں! نہایت اچھے ساتھیوں سے ایک ملاقات ہو گئی۔ اب تک تاریں کا سب سے بڑا اردوبلاگرز کا اجتماع تھا۔نیز سب سے کم وقت میں احباب جمع ہوئے تھے اب تک کی اردو بلاگرز کی تاریخ میں۔

    ReplyDelete
  7. پھر تو یہ ملاقات بہت ہی مفید ثابت ہوئی اور اردو بلاگنگ پر دیرپا اثرات چھوڑے گی۔ اس انتہائی مفید اجتماع اور اردو بلاگنگ پر احسانِ عظیم کیلیے میری طرف سے مبارکباد

    ReplyDelete
  8. Anonymous26/11/10

    مزے کا لکھا ہے آپ نے م بھیا .. پڑھ کے ہنسی آئی مجھے ..
    تصویریں بھی تو لگائیے ۔

    باجو . .

    ReplyDelete
  9. الف نظامی said...
    شکریہ کیا ایجنڈا یہ تھا
    "کراچی میں اردو بلاگنگ کی ترویج کیسے ممکن ہے؟"
    -----------------------------------
    ایجنڈا ۔۔۔ ؟؟؟
    آہ ہ ہ ہ ۔۔ اب کیا بتاؤں
    ’’ مقصود اس سے قطع محبت نہیں مجھے ‘‘

    ReplyDelete
  10. محمد احمد said...
    جی مغل بھائی!
    کل شعیب صفدر صاحب نے اس ناچیز کو بھی یاد کیا تھا اس محفل میں شرکت کے لئے لیکن کل کچھ اس طرح کی مصروفیات رہیں کہ باوجود خواہش کے پہنچ نہیں سکا. آپ کی مختصر روداد پڑھ کر خوشی ہوئی . تصویری جھلکیاں بھی اگر ہوسکیں تو ضرور ارسال کریں.
    ---------------------------------
    یعنی حسبِ معمول ’’ احمد بہ عیش کوش کہ ’’ آ‘‘ لم دوبارہ نیست ‘‘ ۔۔ ہاہہاہاہہ
    تصویر یں اس بار کوئی بھی نہ لے سکا،۔ میں کیمرہ بھول گیا توسبھی بھول کر آگئے ، شعیب بھائی کی تازہ تازہ شادی ہوئی سو ان کو معاف کیا۔۔

    ReplyDelete
  11. عنیقہ ناز said...
    افسوس رہا کہ شامل نہ ہو سکے۔ مصروفیات کی نوعیت ہی کچھ ایسی ہے آجکل۔ شعیب صفدر صاحب نے یادرکھا شکریہ۔
    --------------
    شکریہ عنیقہ جی ، سلامت رہیں ،افسوس کی بات نہ کیجے ، سب سے زیادہ اور پہلے میں آپ کا ذکر کیا، آپ عالم ناموجود سے ہمارے ہمراہ موجود رہیں ۔ دوست منہا نہیں ہوتے ۔ سلامت رہیں۔
    نیاز مشرب

    ReplyDelete
  12. شعیب صفدر said...
    نہایت مختصر و و عمدہ! کیا بات ہے۔
    -----------------------
    شعیب صفدر said...
    نتیجہ بدل دیں! نہایت اچھے ساتھیوں سے ایک ملاقات ہو گئی۔ اب تک تاریں کا سب سے بڑا اردوبلاگرز کا اجتماع تھا۔نیز سب سے کم وقت میں احباب جمع ہوئے تھے اب تک کی اردو بلاگرز کی تاریخ میں۔
    ---------------------
    نتیجہ ۔۔ ہاہاہ۔۔
    ارے آپ نے عنوان پر بھی غور نہیں کیا ؟؟
    ’’ اجتماع ضدین ‘‘ ۔۔۔
    محض طرزِ تحریر ہے ۔ ۔۔ ہمارے سبھی دوست واقف ہیں کہ ’’ ایں سعادت بزورِ بازو نیست ‘‘ کے مصداق اضداد کا جمع ہوجانا معرکے سے کم نہیں ۔
    سراہنے کے لیے ممنون ہوں ۔
    مخلص

    ReplyDelete
  13. سعد said...
    پھر تو یہ ملاقات بہت ہی مفید ثابت ہوئی اور اردو بلاگنگ پر دیرپا اثرات چھوڑے گی۔ اس انتہائی مفید اجتماع اور اردو بلاگنگ پر احسانِ عظیم کیلیے میری طرف سے مبارکباد
    26/11/10
    -------------
    سعد صاحب ۔
    آداب
    میں اسے ’’ طنزِ عظیم ‘‘ پر محمول کروں ؟؟ بہر کیف احمد مشتاق کا شعر آپ کے لیے :
    یار سب جمع ہوئے رات کی تاریکی میں
    کوئی رو کر تو کوئی بال بنا کر آیا۔
    ویسے آپ اسے یوں دیکھتے تو زیادہ اچھا تھا ’’غنیمت ہے جو ہم یاں صورتِ دو چار بیٹھے ہیں ‘‘ صنعتی شہروں کا دکھ ، تعلقات اور مراسم پر کند چھری کا سا عمل ہے ۔ یہ کم ہے کہ ہم ایسے اظہاریہ نویسوں (بلاگرز ) کو جمع کرنے میں کامیاب ہوئے جو بوجوہ تائب ہوچکے ہیں ۔۔ پھر سب سے بڑی بات ایک دوست سات سمندر پار سے اردو اظہاریہ نویسی کی خدمت میں مصروف ہے وہ کراچی یا پاکستان آئیں ۔۔ تو یہ ان کے اعزاز میں ملاقات تھی۔۔ بہت ممکن ہے میری تحریر کا تاثر آپ تک غلط پہنچا ہو، یا مجھ سے کوئی کوتاہی ہوئی ۔ امید ہے رجائیت کو مدِ نظر رکھیں گے ۔ وگرنہ جس معاشرے میں ہم سانسیں گنتے پھرتے ہیں وہاں قنوطیت اورمایوسی ہی ڈیرے ڈال سکتی ہے زندگی تو بہرحال ماتم بہ کنا ں ہے ۔
    آ پ کا خیر خواہ

    ReplyDelete
  14. Anonymous said...
    مزے کا لکھا ہے آپ نے م بھیا .. پڑھ کے ہنسی آئی مجھے ..
    تصویریں بھی تو لگائیے ۔
    باجو . .
    26/11/10
    --------------------
    بہت شکریہ باجو ۔ بس اس بارکوتاہوئی کہ ہم بھی کیمرہ نہ لے گئے اور نہ کوئی دیگر دوست ، اصل میں ہنگامی طور پر بلایا گیا سو سرپٹ بھاگتے ہوئے پہنچنا پڑا۔ میں بھی دفتر سے سیدھا پہنچا تھا۔ زندگی رہی تو انشا اللہ آئندہ ضرور تصاویر پیش کی جائیں گی۔
    آپ کا ۔
    م بھیا

    ReplyDelete
  15. خیالی نقشہ بنا کر میں بھی ہو آیا ہوں
    خوش رہیے

    ReplyDelete
  16. اجلاس کی کاروائی کا شکریہ۔ یہ بات درست ہے کہ اتنے دوست مل کر بیٹھ لیے جو کراچی جیسے شہر میں معجزے سے کم نہیں۔

    ReplyDelete
  17. یقین جانیے، میرے لیے بیک وقت کئی بلاگران سے پہلی بار ملاقات کا شرف حاصل کرنا کسی یادگار سے کم ثابت نہ ہوا. تمام ہی حضرات سے مل کر بہت خوشی ہوئی. خصوصآ مغل صاحب کو ہم باذوق انسان سمجھتے تھے، جو کہ غلط ثابت ہوا اور جناب بہت ہی اعلیٰ ذوق رکھنے والے اور کمال کے شاعر ثابت ہوئے. ابوشامل اور شعیب صفدر کا اس ہنگامی محفل میں شرکت کی دعوت دینے کا بہت شکریہ. اتنے سارے ساتھیوں کے ساتھ وقت گزرنے کا بالکل بھی احساس نہ ہوا. ویسے قبلہ آپ ہمارے ایک اور شریک محفل ساتھی کا ذکر کرنا تو بھول ہی گئے. بھئی ہم تو اس پر اپنا احتجاج ریکارڈ کروانا چاہیں گے.

    ReplyDelete
  18. 27/11/10
    راجہ صاحب said...
    خیالی نقشہ بنا کر میں بھی ہو آیا ہوں
    خوش رہیے
    ----------------
    شکریہ شکریہ قبلہ ، چلیے کسی بہانے سہی آپ یہاں پہ آئے تو۔
    متشکرم منتوار آغا

    ReplyDelete
  19. 27/11/10
    میرا پاکستان said...
    اجلاس کی کاروائی کا شکریہ۔ یہ بات درست ہے کہ اتنے دوست مل کر بیٹھ لیے جو کراچی جیسے شہر میں معجزے سے کم نہیں۔
    ----------------------
    بہت شکریہ جی،
    مالک و مولیٰ سلامت رکھے آئندہ کی بار انشا اللہ سبھی دوستوں کا باقائدہ بہت پہلے سے آگاہ اور مدعو کیا جائے گا ، تاآنکہ اردو اظہاریہ نویسی کو فروغ دیا جاسکے۔

    ReplyDelete
  20. محمداسد said...
    یقین جانیے، میرے لیے بیک وقت کئی بلاگران سے پہلی بار ملاقات کا شرف حاصل کرنا کسی یادگار سے کم ثابت نہ ہوا. تمام ہی حضرات سے مل کر بہت خوشی ہوئی. خصوصآ مغل صاحب کو ہم باذوق انسان سمجھتے تھے، جو کہ غلط ثابت ہوا اور جناب بہت ہی اعلیٰ ذوق رکھنے والے اور کمال کے شاعر ثابت ہوئے. ابوشامل اور شعیب صفدر کا اس ہنگامی محفل میں شرکت کی دعوت دینے کا بہت شکریہ. اتنے سارے ساتھیوں کے ساتھ وقت گزرنے کا بالکل بھی احساس نہ ہوا. ویسے قبلہ آپ ہمارے ایک اور شریک محفل ساتھی کا ذکر کرنا تو بھول ہی گئے. بھئی ہم تو اس پر اپنا احتجاج ریکارڈ کروانا چاہیں گے.
    27/11/10
    ------------------------------
    بہت شکریہ اسد بھائی ، محض آپ کی چشم حسن پرور ہے وگرنہ من آنم کہ من دانم ، امید ہے مراسلت کا شرف حاصل رہے گا۔ نعمان کے حوالے سے مجھ سے یقینا ً غلطی ہوئی میں مدون کردیتا ہون مراسلے کو ،آپ کا احتجاج قبول اور میرے لیے اصلاح مند ثابت ہوا۔ نعمان بھائی سے صمیم ِ قلب سے معذرت خواہ ہوں۔

    ReplyDelete
  21. ایسی دلچسپ روداد بیانی کوئی مغل بھیا سے ہی سیکھے.

    ReplyDelete
  22. 28/11/10
    ابن سعید said...
    ایسی دلچسپ روداد بیانی کوئی مغل بھیا سے ہی سیکھے.
    -----------------
    ارے توبہ توبہ۔۔ صاحب کیوں کانٹوں میں گھسیٹتے ہیں ۔۔
    مجھے مکتب ِ اظہاریہ نویسی میں پیش آنے والی مشکلات کا بخوبی علم ہے ۔
    اور یقناً آپ کو بھی ہوگا۔ ویسے محبتوں کے لیے ممنون ہوں ۔
    باری تعالی ٰ ہمیشہ شاداب و کامران رکھے آمین

    ReplyDelete
  23. حضور میں تو آپ کا پرانا قدردان ہوں بھلا ایسی گستاخی کیسے کر سکتا ہوں۔
    میں بھی اسی پیرائے میں رائے دے رہا تھا جس میں آپ نے یہ تحریر لکھی۔
    پڑھ کر لطف آیا۔ لکھنے کیلیے اور بلاگ دوبارہ زندہ کرنے کیلیے شکریہ

    ReplyDelete
  24. دل چسپ لکھا ہے۔ رخصت ہوتے وقت ’’جیتی رہو بٹیا‘‘ والا واقعہ تو کمال کا تھا۔

    ReplyDelete